rehber Logo

جماعت اسلامی کی کال پر پٹرولیم لیوی اور پٹرولیم مصنوعات کی قیمتوں میں اضافے کے خلاف اوکاڑہ میں ڈسٹرکٹ بار کے وکلاء، تاجر برادری، جماعت اسلامی کے کارکنان اور سول سوسائٹی نے احتجاج کیا۔ اس موقع پر تاجر برادری کی جانب سے بھی جزوی ہڑتال کی گئی۔

جماعت اسلامی اوکاڑہ کے زیر اہتمام گول چوک میں احتجاجی مظاہرہ کیا گیا، جس میں شرکاء نے پٹرولیم مصنوعات کی قیمتوں میں مسلسل اضافے اور پٹرولیم لیوی کے خلاف نعرے بازی کی۔ مقررین نے کہا کہ پٹرولیم مصنوعات کی قیمتوں میں اضافے سے مہنگائی میں مسلسل اضافہ ہو رہا ہے اور اشیائے خورونوش سمیت روزمرہ استعمال کی دیگر اشیاء عوام کی پہنچ سے دور ہوتی جا رہی ہیں۔مقررین کا کہنا تھا کہ پٹرولیم مصنوعات کی قیمتوں میں اضافے کا سب سے زیادہ بوجھ غریب، مزدور اور متوسط طبقے پر پڑ رہا ہے۔ انہوں نے حکومت سے مطالبہ کیا کہ پٹرولیم لیوی اور قیمتوں میں اضافے کا فیصلہ واپس لے کر عوام کو ریلیف فراہم کیا جائے۔