پاکستان کے نوجوان فٹبالرز میں بے پناہ ٹیلنٹ موجود ہے: نولبرٹو سولانو
پاکستان فٹبال ٹیم کے ہیڈ کوچ نولبرٹو سولانو نے کہا ہے کہ پاکستان فٹبال ٹیم کو مضبوط اور مسابقتی بنانے کے لیے اقدامات کر رہے ہیں ، پاکستان کے نوجوان فٹبالرز میں بے پناہ ٹیلنٹ موجود ہے ۔
پاکستان فٹبال ٹیم کے ہیڈ کوچ نولبرٹو سولانو نے پریس کانفرنس میں کہا کہ پاکستان میں فٹبال کے فروغ کے لیے اسپانسرز اور وسائل کی فراہمی ناگزیر ہے، انہیں وسائل اور سرپرستی کی ضرورت ہے۔ انہوں نے کہا کہ بھارت گزشتہ 20 سال سے پروفیشنل فٹبال پر کام کر رہا ہے۔ ہمیں بھی اسی طرز پر آگے بڑھنا ہوگا۔پاکستانی فٹبالرز کی فٹنس سے مکمل مطمئن نہیں، کھلاڑیوں کو جسمانی طور پر مزید مضبوط ہونا ہوگا، پاکستانی ٹیم بتدریج بہتری کی جانب گامزن ہے، ہم قدم بہ قدم آگے بڑھ رہے ہیں۔ انہوں نے کہا کہ ہر میچ کو فائنل سمجھ کر کھیلنا ہوگا، قومی ٹیم کو ہر مقابلے کے لیے بھرپور تیاری کرنا ہوگی۔ ساف چیمپئن شپ میں پہلا ہدف اگلے مرحلے اور سیمی فائنل تک رسائی ہے، بھارت کے خلاف اچھا نتیجہ حاصل کرنا چاہتے ہیں، یہ مقابلہ پاکستانی فٹبال شائقین کے لیے انتہائی اہم ہے، قومی ٹیم کو بین الاقوامی سطح پر مسابقتی بنانے کے لیے نوجوان کھلاڑیوں کی صلاحیتوں پر کام کر رہے ہیں۔
Leave A Comment