اسرائیل کی دفاعی کمپنی کے قریب دھماکا، آگ کے شعلے دور تک دیکھے گئے

اسرائیل کی دفاعی کمپنی کے قریب دھماکا ہوا ہے جس سے آگ کے بادل میلوں دور تک دکھائی دیے۔ عبرانی میڈیا کے مطابق دھماکا مقبوضہ بیت المقدس کے مغربی علاقے بیت شمیش میں ہوا اور فوج نے ہنگامی صورتحال سے نمٹنے والی گاڑیوں کے داخلے پر بھی پابندی لگادی ہے۔ کہا جارہا ہے کہ دھماکا حساس تنصیب میں ہوا ہے۔ بعض اطلاعات کے مطابق فیکٹری میں ہیوی اور لائٹ راکٹ انجن بنائے جاتے ہیں جن میں ایرو ٹو، ایرو تھری ، سلور اینکر راکٹ انجن، براک ایٹ اور براک ایم ایکس میزائلوں کے انجن بھی شامل ہیں۔ دھماکے کی وجہ معلوم نہیں ہوسکی اور اس میں ممکنہ جانی نقصان کے بارے میں بھی نہیں بتایا گیا۔   اسرائیلی حکام کا دعویٰ ہے کہ یہ دھماکا خیز مواد کا کنٹرولڈ دھماکا تھا تاہم قریبی علاقوں کواس سے متعلق پیشگی آگاہ نہ کیے جانے سے کئی سوالات پیدا ہوئے ہیں۔