پی ایس ایل، ملتان سلطان نے کوئٹہ گلیڈی ایٹرزکو شکست دے دی
پاکستان سپر لیگ 2026 کے 13ویں میچ میں ملتان سلطانز نے شاندار کارکردگی کا مظاہرہ کرتے ہوئے کوئٹہ گلیڈی ایٹرز کو 15 گیندیں قبل ہی 6 وکٹوں سے ہرا دیا۔ قذافی اسٹیڈیم میں کھیلے گئے اس میچ میں سلطانز کے بلے بازوں نے 167 رنز کا ہدف محض 17.3 اوورز میں حاصل کر کے پوائنٹس ٹیبل پر اپنی پوزیشن مزید مستحکم کر لی۔
ٹاس ہارنے کے بعد پہلے بیٹنگ کرتے ہوئے کوئٹہ گلیڈی ایٹرز کی ٹیم مقررہ 20 اوورز میں 7 وکٹوں کے نقصان پر 166 رنز بنا سکی۔ کپتان سعود شکیل 56 رنز بنا کر نمایاں رہے جبکہ بیون جیکبز نے آخر میں 49 رنز کی جارحانہ اننگز کھیل کر مجموعے کو سہارا دیا۔ ملتان سلطانز کی جانب سے محمد نواز نے تباہ کن باؤلنگ کرتے ہوئے 30 رنز کے عوض 3 اہم وکٹیں حاصل کیں، جبکہ عرفات منہاس نے کفایتی باؤلنگ کرتے ہوئے صرف 14 رنز دے کر 2 کھلاڑیوں کو آؤٹ کیا۔ہدف کے تعاقب میں ملتان سلطانز کا آغاز انتہائی جارحانہ رہا۔ اسٹیون اسمتھ نے 35 گیندوں پر 53 رنز کی دلکش اننگز کھیلی، جبکہ صاحبزادہ فرحان نے صرف 14 گیندوں پر 32 رنز بنا کر ٹیم کو بہترین پلیٹ فارم مہیا کیا۔ مڈل آرڈر میں شان مسعود نے ذمہ دارانہ بیٹنگ کا مظاہرہ کیا اور 30 گیندوں پر 46 رنز بنا کر ناٹ آؤٹ رہے، جس کی بدولت سلطانز نے مطلوبہ ہدف 18ویں اوور میں ہی حاصل کر لیا۔ کوئٹہ کی جانب سے حسن نواز نے 2 وکٹیں حاصل کیں مگر وہ اپنی ٹیم کو شکست سے نہ بچا سکے۔
Leave A Comment