rehber Logo

حقوق بلوچستان لانگ مارچ کو لاہور میں داخلے کے بعد روک دیا گیا ہے، پنجاب پولیس نے منصورہ کا گھیراؤ کر کے قافلے کو آگے بڑھنے سے روک دیا ہے۔ مولانا ہدایت الرحمٰن بلوچ کی قیادت میں لانگ مارچ کا قافلہ پیر کی شب لاہور پہنچا تھا، جس کی اگلی منزل اسلام آباد تھی۔ مارچ کے منتظمین اور پنجاب حکومت میں مذاکرات جاری ہیں۔پولیس کی بھاری نفری، واٹر کینن اور پریزنر وینز منصورہ کے اطراف تعینات کر دی گئی ہیں۔ پولیس نے منصورہ آنے اور جانے والے تمام راستے بند کر دیے ہیں اور مظاہرین کو روکے جانے کی اطلاعات ہیں۔

خیال رہے کہ لانگ مارچ کا آغاز پانچ روز قبل کوئٹہ سے ہوا تھا، جس کا مقصد بلوچستان کے عوام کے بنیادی حقوق کا حصول اور وفاق کی توجہ مظالم کی جانب مبذول کروانا ہے۔سیکرٹری جنرل جماعت اسلامی امیرالعظیم نے پنجاب حکومت کی کارروائی کو اوچھے ہتھکنڈے قرار دیتے ہوئے شدید مذمت کی ہے۔ ان کا کہنا تھا کہ حکومت کو چاہیے کہ وہ پرامن مظاہرین کو روکے بغیر آگے بڑھنے دے، ریاستی جبر سے آواز کو دبایا نہیں جا سکتا۔امیرالعظیم نے پولیس سے مطالبہ کیا کہ منصورہ کا گھیراؤ فوری ختم کیا جائے اور شرکاء کو اسلام آباد جانے دیا جائے۔ ان کا مزید کہنا تھا کہ حکومت نے فورٹ منرو کے بعد راستے میں جگہ جگہ رکاوٹیں کھڑی کر کے لانگ مارچ کی راہ میں مشکلات پیدا کیں، جو بنیادی انسانی حقوق کی خلاف ورزی ہے۔حقوق بلوچستان لانگ مارچ کے شرکاء کا کہنا ہے کہ ان کا احتجاج پرامن ہے اور وہ اپنے آئینی حقوق کے لیے جدوجہد کر رہے ہیں۔

حکومت اور جماعت اسلامی میں مذاکرات جاری

حق دو بلوچستان تحریک کے تحت لانگ مارچ کو روکنے کیلئے صوبائی حکومت اور جماعت اسلامی کے درمیان اہم مذاکرات جاری ہیں۔حکومت کی جانب سے سینئر وزیر مریم اورنگزیب اور وزیر قانون صہیب بھرت مذاکرات میں شریک ہیں، جبکہ جماعت اسلامی کی نمائندگی لیاقت بلوچ، امیر العظیم اور بلوچستان سے تعلق رکھنے والے معروف رہنما ہدایت الرحمٰن کر رہے ہیں۔ صوبائی وزیر صحت سلمان رفیق بھی مذاکرات میں شرکت کے لیے منصورہ پہنچ چکے ہیں، جہاں جماعت اسلامی کی قیادت سے مارچ کے مستقبل پر بات چیت کی جا رہی ہے۔

دوسری جانب لاہور پولیس نے شہر میں ممکنہ مارچ کے پیشِ نظر سخت حفاظتی انتظامات کر لیے ہیں۔ پولیس کی بھاری نفری، واٹر کینن، پریژن وینز اور اینٹی رائٹ فورس مختلف مقامات پر تعینات کر دی گئی ہے تاکہ کسی بھی ناخوشگوار صورتِ حال سے نمٹا جا سکے۔