rehber Logo

ڈیفنس فیز 6 اتحاد کمرشل میں واقع فلیٹ سے خاتون کی لاش برآمد ہوئی ہے، پولیس نے کارروائی کے لیے لاش اسپتال منتقل کردی ہے۔ایس ایچ او گذری نے بتایا کہ ڈیفنس فیز 6 اتحاد کمرشل لین نمبر 5 میں قائم رہائشی عمارت کی تیسری منزل کے فلیٹ سے خاتون کی لاش ملی جو تقریباً 20 سے 25 دن پرانی تھی، خاتون کی شناخت 35 سالہ حمیرا اصغر علی کے نام سے کی گئی جس کا تعلق شوبز تھا اور وہ مذکورہ فلیٹ میں اکیلی ہی رہائش پذیر تھی۔ ابتدائی تحقیقات میں معلوم ہوا ہے کہ متوفیہ حمیرا اصغر علی مذکورہ فلیٹ میں 2018 سے کرایے پر رہائش پذیر تھیں اور 2024 سے انہوں نے کرایہ دینا بند کر دیا تھا جس کے بعد مالک مکان نے عدالت سے رجوع کیا تھا۔ عدالت کے حکم پر فلیٹ خالی کرانے کے لیے بیلف نے پولیس سے رابطہ کیا اور اس کے بعد پولیس ان کے ہمراہ فلیٹ پر پہنچی تو فلیٹ کا دروازہ اندر سے بند تھا جس سے توڑ کر اندر گئے تو خاتون کی تعفن زدہ لاش کمرے میں پڑی ملی، جس پر کرائم سین یونٹ کو طلب کر کے شواہد حاصل کیے گئے۔ خاتون کی لاش کو ضابطے کی کارروائی کے لیے جناح اسپتال منتقل کر دیا گیا جبکہ پولیس نے مذکورہ فلیٹ کو سیل بھی کر دیا ہے۔فوری طور پر ہلاکت کی وجہ معلوم نہیں ہو سکی تاہم شبہ ہے کہ خاتون کی ہلاکت طبعی طور پر ہوئی ہو، خاتون کا پوسٹ مارٹم کرایا جائیے گا جس کی رپورٹ آنے کے بعد ہی وجہ موت کا حتمی تعین کیا جا سکے گا۔ پولیس کا متوفیہ کے کسی بھی رشتے دار سے کوئی رابطہ نہیں ہوا اور اس حوالے سے پولیس مزید تحقیقات کر رہی ہے۔