rehber Logo

کراچی میں سندھ بلڈنگ کنٹرول اتھارٹی (ایس بی سی اے) کے دفتر میں پولیس نے چھاپہ مار کر 5 ڈائریکٹرز کو گرفتار کرلیا۔سندھ بلڈنگ کنٹرول اتھارٹی (ایس بی سی اے) کے حکام کے خلاف اہم کارروائی کی گئی ہے، پولیس کی بھاری نفری نے چھاپہ مار کارروائی کرتے ہوئے ایس بی سی اے کے 5 ڈائریکٹرز کو گرفتار کرلیا، چھاپے کے دوران وزیراعلیٰ سندھ کی انسپیکشن ٹیم بھی موجود تھی۔

یاد رہے کہ سندھ حکومت نے لیاری میں عمارت گرنے کے سانحے پر سندھ بلڈنگ کنٹرول اتھارٹی (ایس بی سی اے) کے سربراہ اسحٰق کھوڑو کو معطل کر دیا تھا۔سندھ کے سینئر وزیر شرجیل انعام میمن نے وزیر بلدیات سعید غنی اور وزیر داخلہ ضیا لنجار کے ہمراہ پریس کانفرنس کرتے ہوئے کہا تھا کہ لیاری میں عمارت گرنے کے سانحے میں ملوث افراد کے خلاف سخت کارروائی کی جائے گی، فرائض میں کوتاہی برتنے والوں کے خلاف سخت کارروائی کی جائے گی۔بعد ازاں سندھ حکومت کی جانب سے شاہ میر خان بھٹو کو نیا ڈی جی ایس بی سی اے تعینات کردیا گیا تھا، اس سلسلے میں نوٹی فیکیشن بھی جاری کیا گیا تھا۔اس سے قبل شاہ میر بھٹو سیکرٹری چیف منسٹر انکوائری کمیٹی تعینات تھے ،جب کہ 20 ویں گریڈ کے اسحٰق کھوڑو کے خلاف محکمہ جاتی کاروائی شروع کردی گئی ہے۔سندھ حکومت نے سابق ڈی جی ایس بی سی اے اسحٰق کھوڑو کے خلاف تحقیقات کا فیصلہ کیا ہے، اسحٰق کھوڑو بلڈنگ گرنے کے کسی واقعے میں ملوث پائے گئے تو کاروائی کی جائے گی