ایف آئی اے کا حوالہ ہنڈی والوں کیخلاف کریک ڈاؤن، 9 ملزم گرفتار,ملکی و غیرملکی کرنسی برآمد
وفاقی تحقیقاتی ایجنسی نے کارروائی کر کے حوالہ ہنڈی کا کام کرنے والے گروہ کے 9 کارندوں کو گرفتار کرلیا ہے۔ ڈی جی ایف آئی اے کی ہدایات پر حوالہ ہنڈی اور غیر قانونی کرنسی ایکسچینج میں ملوث نیٹ ورکس کے خلاف کریک ڈاؤن کیا گیا۔ گرفتار ملزمان میں محمد حمزہ خان ، محمد یاسین، امداد اللہ اور دانش جمیل، موصم ، محمد ابرار، ذاکر علی، محمد علی اور حق نواز شامل ہیں۔ایف آئی اے کے مطابق ملزمان کو پشاور ، نوشہرہ ، مردان اور لوئر دیر کے مختلف علاقوں سے گرفتار کیا گیا جبکہ چھاپے کے دوران ملزمان سے بھاری مالیت کی ملکی و غیر ملکی کرنسی برآمد ہوئی۔ملزمان سے مجموعی طور 34 لاکھ 60 ہزار روپے برآمد، جبکہ غیر ملکی کرنسی کی مد میں 9300 سعودی ریال ، 500 اماراتی درہم ، 1250 قطری ریال اور 750 افغانی بھی برآمد ہوئے۔ملزمان سے حوالہ ہنڈی سے متعلق رسیدیں اور دیگر شواہد بھی برآمد کر لیے گئے، ملزمان بغیر لائسنس کرنسی ایکسچینج کا کاروبار کرنے اور حوالہ ہنڈی میں ملوث پائے گئے۔
Leave A Comment