شدید بارش کے باوجود پرتگال میں مہنگائی کے خلاف ہزاروں افراد کا مارچ
پرتگال کے دارالحکومت لزبن میں شدید بارش کے باوجود ہزاروں افراد نے بڑھتے اخراجات، مہنگے کرایوں اور کم تنخواہوں کے خلاف احتجاج کیا۔پرتگال کے دارالحکومت لزبن میں ہزاروں افراد نے مہنگائی، رہائش کے بڑھتے اخراجات اور کم تنخواہوں کے خلاف مارچ کیا۔ مظاہرین نے حکومت سے عام لوگوں کی مشکلات کم کرنے کے لیے اقدامات کا مطالبہ کیا۔پرتگال کی سب سے بڑی ٹریڈ یونین تنظیم سی جی ٹی پی نے احتجاج کی کال دی تھی۔ تنظیم نے تنخواہوں اور پنشن میں اضافے، ضروری اشیا اور خدمات کی قیمتیں کم کرنے اور رہائش کے اخراجات پر قابو پانے کے لیے اقدامات کا مطالبہ کیا۔احتجاج میں شریک 44 سالہ فیکٹری ورکر نے کہا کہ لوگ زیادہ کام کر رہے ہیں، اخراجات بڑھ رہے ہیں، لیکن روزمرہ زندگی گزارنے کے لیے ان کے پاس پیسے نہیں بچتے۔ ان کے مطابق ڈیزل، پیٹرول، رہائش اور دیگر اشیا کی قیمتیں مسلسل بڑھ رہی ہیں۔احتجاج میں شریک 66 سالہ ریٹائرڈ آئی ٹی ٹیکنیشن لوئس روسو نے کہا کہ وہ تنخواہوں اور پنشن میں اضافے اور کرائے کے مکانات کی منڈی میں منافع خوری کے خلاف آواز اٹھانے آئے ہیں۔ ان کے بقول حکومت عام لوگوں کے بجائے بڑے مفادات رکھنے والے گروہوں کے لیے کام کر رہی ہے۔
شدید بارش کے باوجود مظاہرین چھتریاں اور برساتی لباس پہنے لزبن کی دو بڑی شاہراہوں پر مارچ کرتے رہے۔ سی جی ٹی پی نے شرکا کی تعداد ہزاروں میں بتائی، تاہم پولیس نے مظاہرین کی تعداد کے بارے میں کوئی تخمینہ جاری نہیں کیا۔
یورپی شماریاتی ادارے یورو اسٹیٹ کے مطابق پرتگال میں 2025 کے دوران اوسط سالانہ آمدنی یورپی یونین کی اوسط آمدنی سے 37 فیصد کم تھی، جب کہ اکتوبر میں افراطِ زر کی شرح 3.8 فیصد ریکارڈ کی گئی، جس کی بڑی وجوہات خوراک اور توانائی کی قیمتوں میں اضافہ تھیں۔پرتگال کو رہائش کے بڑھتے اخراجات کے بحران کا بھی سامنا ہے۔ 2017 کے بعد سے گھروں کی قیمتیں دو گنا سے زیادہ ہو چکی ہیں، جب کہ نئے کرایہ ناموں کے تحت مکانوں کے کرائے بھی تقریباً دو گنا بڑھ گئے ہیں۔ اس صورت حال سے خصوصاً نوجوان زیادہ متاثر ہو رہے ہیں۔
یہ احتجاج لزبن اور پورٹو میں رہائشی حقوق کے کارکنوں کے کئی ہفتوں سے جاری احتجاج کے بعد ہوا ہے۔ اس دوران مظاہرین نے دونوں شہروں میں خیمے لگا کر رہائش کے بحران کے خلاف احتجاج کیا۔ پرتگال میں یہ مظاہرے یورپ کے مختلف ملکوں میں مہنگائی اور رہائش کے اخراجات کے خلاف جاری احتجاجی تحریکوں کا حصہ ہیں۔
Leave A Comment