پاکستان ،سری لنکا کا آج فائنل،قذافی سٹیڈیم میں تیاریاں مکمل
قذافی سٹیڈیم میں پاکستان کرکٹ ٹیم اور سری لنکا کے درمیان ٹرائی نیشن سیریز کا فائنل آج کھیلا جائیگا،میچ پاکستانی وقت کے مطابق 1 بجے دوپہر شروع ہوگا۔
قذافی سٹیڈیم میں فیصلہ کن میچ سے قبل تمام تیاریاں مکمل کر لی گئی ہیں۔سی ای او ایل ڈبلیو ایم سی نے قذافی سٹیڈیم کا دورہ کیا اور صفائی ستھرائی کے انتظامات کا تفصیلی جائزہ لیا۔اس موقع پر انہوں نے بتایا کہ فائنل میچ سے قبل سٹیڈیم کے تمام انکلوژرز کی صفائی اور دھلائی مکمل کر لی گئی ہے۔ فائنل میچ کے دوران سٹیڈیم کی اندرونی اور بیرونی صفائی کے لیے 320 سے زائد صفائی ورکرز تعینات کیے گئے ہیں۔صفائی کے انتظامات کی مسلسل نگرانی کے لیے 30 سے زائد سپروائزرز بھی ڈیوٹی انجام دیں گے۔شائقین کرکٹ کو صاف ستھرا ماحول فراہم کرنے کے لیے پارکنگ ایریاز میں بھی صفائی عملہ تعینات کیا گیا ہے۔سٹیڈیم کی واشنگ کے لیے 5 مکینیکل واشرز اور 3 منی ڈمپرز استعمال کیے جا رہے ہیں۔نشستوں کی ڈسٹنگ اور واش رومز کی صفائی و دھلائی کے لیے بھی خصوصی عملہ تعینات کیا گیا ہے۔
صوبائی وزیر کھیل نے قومی ٹیم کیلئے نیک تمناؤں کا اظہار کرتے ہوئے کہا ہے کہ امید ہے فائنل میں سنسنی خیز اور کانٹے دار مقابلہ ہوگا۔دونوں ٹیمیں بہترین کھیل پیش کریں گی اور شائقین کرکٹ کو ایک یادگار اور دلچسپ مقابلہ دیکھنے کو ملے گا۔
