rehber Logo

مشیر وزیراعظم رانا ثناء اللہ نے کہا ہے کہ وزیراعظم شہباز شریف اور اپوزیشن لیڈر محمود اچکزئی کی ملاقات وزیراعظم ہاؤس میں ہی ہوگی۔ ان کا کہنا ہے کہ پی ٹی آئی سے غیر مشروط مذاکرات ہوسکتے ہیں، تاہم ایمرجنسی واپس لینے کی شرط قبول نہیں کی جاسکتی۔وزیراعظم شہباز شریف اور اپوزیشن لیڈر محمود اچکزئی کی ملاقات وزیراعظم ہاؤس میں ہی ہوگی اور حکومت ملاقات کے لیے کسی تیسری جگہ مقرر کرنے کی شرط تسلیم نہیں کرے گی۔وزیراعظم ہاؤس کسی کی ذاتی ملکیت نہیں بلکہ ریاست کی ملکیت ہے۔ اس نوعیت کی ضد پہلے بھی کی جاتی رہی ہے، جو قابل قبول نہیں۔اپوزیشن لیڈر کو بتانا چاہیے کہ وہ وزیراعظم سے ملاقات کے لیے کب آئیں گے، حکومت ان کا خیرمقدم کرنے کے لیے تیار ہے۔

 چیف الیکشن کمشنر اور الیکشن کمیشن کے ارکان کی تقرری کے معاملے پر وزیراعظم نے اپوزیشن لیڈر کو دو خطوط لکھے ہیں۔مشیرِ وزیرِاعظم کے مطابق ایک خط وزیراعظم کی امریکا روانگی سے پہلے بھیجا گیا تھا، جب کہ دوسرا واپسی پر ارسال کیا گیا۔ ان کا کہنا تھا کہ حکومت اب اپوزیشن لیڈر کے جواب کی منتظر ہے۔ پاکستان تحریک انصاف کے ساتھ غیر مشروط مذاکرات ہوسکتے ہیں، تاہم ایمرجنسی واپس لینے کی شرط پر بات چیت ممکن نہیں۔ ان کے بقول پی ٹی آئی نے پہلے مذاکرات کو موقع ہی نہیں دیا۔ایمرجنسی کے تحت قائم انتظامی سیٹ اپ کو مناسب وقت دیا جائے گا اور حکومت دہشت گردی کے خلاف جنگ پوری سنجیدگی اور عزم کے ساتھ لڑے گی۔ ان کا کہنا تھا کہ اگر پی ٹی آئی دہشت گردی کے خلاف جنگ میں تعاون کرے تو اس معاملے پر بات ہوسکتی ہے۔