روس امریکا اور عالمی منڈی کو لاکھوں ٹن ڈیزل فراہم کرے گا، ٹرمپ

امریکی صدر ڈونلڈ ٹرمپ نے کہا ہے کہ روس امریکا اور عالمی منڈی کو فوری طور پر 3 لاکھ ٹن سے زائد ڈیزل فراہم کرے گا جبکہ نومبر میں مزید 5 لاکھ ٹن اور نومبر کے بعد مزید 10 لاکھ ٹن ڈیزل فراہم کیا جائے گا۔

امریکی صدر ٹرمپ نے اپنے بیان میں کہا کہ روسی صدر پیوٹن سے انتہائی کامیاب ٹیلی فونک گفتگو ہوئی ہے۔ انہوں نے کہا کہ ڈیزل کی ریکارڈ بلند قیمتیں جلد بہت نیچے آجائیں گی، قیمتوں سے متعلق بہت جلد اعلان کروں گا۔روسی صدارتی دفتر کے مطابق گفتگو میں یوکرین بحران کے حل، امن مذاکرات کی بحالی اور ایران کی صورتِ حال پر تبادلۂ خیال کیا گیا۔یہ گفتگو ڈیڑھ گھنٹے تک جاری رہی۔

کریملن کے مطابق پیوٹن نے امن مذاکرات دوبارہ شروع کرنے کے وقت پر غور کرنے کی بات کی جبکہ ٹرمپ نے ایران تنازع کے حل میں روس کے کردار کو سراہا۔ پیوٹن نے یہ بھی کہا کہ امریکی مارکیٹ میں روسی تیل کی فراہمی سے عالمی معیشت پر مثبت اثر پڑ سکتا ہے۔دونوں صدور نومبر میں چین میں ہونے والی سربراہی کانفرنس میں شرکت کے خواہش مند ہیں۔

اس سے قبل ٹرمپ نے وائٹ ہاؤس میں صحافیوں سے گفتگو کرتے ہوئے کہا تھا کہ عالمی منڈیوں میں ریکارڈ بلند قیمتیں جلد کم ہوں گی اور ڈیزل کی قیمتوں میں بھی بڑی کمی آئے گی۔انہوں نے دعویٰ کیا کہ ایران کو جوہری ہتھیار رکھنے سے روک دیا گیا ہے اور معاملہ جلد ختم ہو جائے گا۔