ویمنز ٹی20 ورلڈکپ: پاکستان کیخلاف بھارت کا ٹاس جیت کر بیٹنگ کا فیصلہ
برمنگھم میں جاری آئی سی سی ویمنز ٹی 20 ورلڈ کپ کے اہم میچ میں بھارتی ویمنز ٹیم نے پاکستان کے خلاف ٹاس جیت کر پہلے بیٹنگ کرنے کا فیصلہ کیا ہے۔ ٹاس کے موقع پر بھارتی کپتان ہرمن پریت کور نے ایک بار پھر پاکستانی کپتان فاطمہ ثناء سے ہاتھ نہیں ملایا، جس پر شائقین کرکٹ کی توجہ مرکوز رہی۔ ٹاس کے بعد گفتگو کرتے ہوئے بھارتی کپتان ہرمن پریت کور نے کہا کہ پچ بیٹنگ کے لیے انتہائی سازگار دکھائی دے رہی ہے، اسی لیے انہوں نے پہلے بیٹنگ کا فیصلہ کیا۔ انہوں نے کہا کہ گزشتہ ورلڈ کپ سے ٹیم کو بہت زیادہ اعتماد ملا ہے اور کھلاڑیاں اس اہم مقابلے کے لیے بے حد پُرجوش ہیں۔
پاکستان ویمنز ٹیم کی کپتان فاطمہ ثناء نے بھی پچ کو بیٹنگ کے لیے موزوں قرار دیا، تاہم انہوں نے کہا کہ ان کی ٹیم کے پاس معیاری بولنگ اٹیک موجود ہے اور کوشش ہوگی کہ بھارتی ٹیم کو کم اسکور تک محدود رکھا جائے۔پاکستان کے پاس تجربہ کار اسپنرز اور تیز گیند باز موجود ہیں جو میچ میں اہم کردار ادا کر سکتے ہیں۔ انہوں نے اس عزم کا اظہار کیا کہ ٹیم بھرپور کارکردگی کا مظاہرہ کرتے ہوئے کامیابی کے لیے میدان میں اترے گی۔
