حکومت برآمدات کا مقررہ ہدف حاصل کرنے میں ناکام

حکومت گزشتہ مالی سال کے دوران برآمدات کا مقررہ ہدف حاصل کرنے میں 5.2 ارب ڈالر سے ناکام رہی، جبکہ برآمدی آمدن گھٹ کر 30.1 ارب ڈالر رہ گئی، جس کے نتیجے میں تجارتی خسارے میں 2ہندسوں کا اضافہ ہوا اور پاکستان کی معیشت کی بنیادی کمزوریاں ایک بار پھر نمایاں ہو گئیں۔مالی سال 2025-26کے دوران برآمدات میں کمی اور درآمدات میں اضافے کے باعث سالانہ تجارتی خسارہ 7 ارب ڈالر بڑھ گیا، جو تقریباً تین سالہ آئی ایم ایف بیل آؤٹ پیکیج کے حجم کے برابر ہے۔یہ ہدف ایسے وقت میں حاصل نہ ہو سکا جب پلاننگ کمیشن نے گزشتہ ماہ قومی اقتصادی کونسل (NEC) کو سفارش کی تھی کہ معاشی مراعات کو تحفظ پسندی اور رینٹ سیکنگ کے بجائے پیداواری صلاحیت اور برآمدی کارکردگی سے منسلک کیا جائے۔تاہم حکومت نے اس سفارش پر عمل درآمد نہیں کیا اور ایک مرتبہ پھر عمومی نوعیت کی برآمدی سبسڈیز جاری رکھیں۔

گزشتہ مالی سال کے سالانہ منصوبے میں کہا گیا تھا کہ مالی سال 2025-26کے لیے برآمدات کا ہدف 35.3 ارب ڈالر مقرر کیا گیا ہے، جو قومی اقتصادی تبدیلی منصوبہ 2024-29سے ہم آہنگ ہے۔تاہم پاکستان بیورو آف شماریات (PBS) نے جمعرات کو جاری کردہ اعداد و شمار میں بتایا کہ مالی سال 2025-26کے دوران برآمدات 6 فیصد کمی کے ساتھ صرف 30.1 ارب ڈالر رہیں۔حکومت مالی سال 2025-26کے دوران آئی ایم ایف کی جانب سے مقرر کردہ ٹیکس وصولیوں کے ہدف سے بھی 975 ارب روپے (تقریباً 3.5 ارب ڈالر) کم رہی۔اعداد و شمار کے مطابق گزشتہ مالی سال میں برآمدات گزشتہ سال کے مقابلے میں 1.9 ارب ڈالر کم رہیں، برآمدات مسلسل منفی رجحان کا شکار رہیں، جبکہ درآمدات میں دو ہندسوں کی شرح سے اضافہ دیکھا گیا۔اس کی وجہ بجٹ میں درآمدی ڈیوٹی میں نرمی اور مشرق وسطیٰ کی کشیدگی کے بعد پٹرولیم مصنوعات کی بلند قیمتیں قرار دی جا رہی ہیں۔