rehber Logo

علامہ ڈاکٹر محمد اقبال 9 نومبر 1877ء کو سیالکوٹ میں پیدا ہوئے۔ ہر سال 9 نومبر کو ملک بھر میں یومِ اقبال منایا جاتا ہے۔ اس موقع پر سرکاری و نجی سطح پر تقریبات منعقد ہوتی ہیں اور تعلیمی اداروں میں اقبال کی شخصیت، فکر، فلسفے اور شاعری پر اظہارِ خیال کیا جاتا ہے۔ ان تقریبات میں عموماً اقبال کے تصورِ خودی، شاہین، مردِ مومن اور نوجوانوں کے لیے ان کے پیغام کو موضوع بنایا جاتا ہے، لیکن اقبال کی شخصیت اور شاعری کا ایک نہایت اہم پہلو ایسا بھی ہے جسے ہماری روایتی تقریبات اور مباحث میں وہ توجہ نہیں ملتی جس کا وہ مستحق ہے۔ یہ پہلو ہے: اقبال بطور شاعرِ مزدور، کسان اور محکوم طبقہ۔

اقبال محض خوابِ خودی اور فلسفۂ عشق کے شاعر نہیں تھے بلکہ ان کی شاعری میں مظلوم، محروم، محکوم اور استحصال زدہ انسان کی آواز بھی پوری قوت کے ساتھ سنائی دیتی ہے۔ انہوں نے اپنے عہد کے معاشی و سماجی نظام، طبقاتی تفاوت، سرمایہ دارانہ استحصال اور سامراجی تسلط پر سوال اٹھائے اور محنت کش انسان کو اپنی اجتماعی قوت پہچاننے اور اپنے حقوق کے لیے جدوجہد کرنے کا پیغام دیا۔

اقبال جب دنیا کے غریبوں اور محکوموں کو بیدار ہونے کی دعوت دیتے ہیں تو ان کا لہجہ محض شاعرانہ نہیں بلکہ ایک انقلابی صدا بن جاتا ہے:

اٹھو مری دنیا کے غریبوں کو جگا دو
کاخِ امرا کے در و دیوار ہلا دو

گرماؤ غلاموں کا لہو سوزِ یقیں سے
کنجشکِ فرومایہ کو شاہیں سے لڑا دو

سلطانیِ جمہور کا آتا ہے زمانہ
جو نقشِ کہن تم کو نظر آئے مٹا دو

یہ اشعار اس طبقاتی کشمکش کی بھرپور عکاسی کرتے ہیں جس میں ایک طرف دولت، وسائل اور اقتدار پر قابض مراعات یافتہ طبقہ ہے اور دوسری طرف اپنی محنت سے معاشرے کی معیشت کا پہیہ چلانے والا محروم انسان۔ اقبال غریبوں کو محض اپنی محرومی پر آنسو بہانے کا مشورہ نہیں دیتے بلکہ انہیں بیداری، خود اعتمادی اور جدوجہد کا راستہ دکھاتے ہیں۔ ان کے نزدیک معاشرے کی حقیقی تبدیلی اس وقت ممکن ہے جب محکوم طبقہ اپنی اجتماعی قوت کو پہچان کر فرسودہ اور ظالمانہ نظام کو چیلنج کرے۔

اقبال کی شاعری میں کسان بھی ایک اہم کردار کے طور پر سامنے آتا ہے۔ وہ اس حقیقت سے بخوبی آگاہ تھے کہ جس معاشرے کی معیشت کا انحصار زراعت پر ہو، وہاں کسان کی بدحالی دراصل پورے معاشی نظام کی ناکامی کا ثبوت ہے۔ وہ جاگیردارانہ استحصال اور کسان کی محنت کے ثمرات پر دوسروں کے قبضے کے خلاف اپنی آواز بلند کرتے ہوئے کہتے ہیں:

جس کھیت سے دہقاں کو میسر نہیں روزی
اس کھیت کے ہر خوشۂ گندم کو جلا دو

یہ محض ایک انقلابی شعر نہیں بلکہ زرعی معیشت میں موجود ناانصافی کے خلاف ایک بھرپور احتجاج ہے۔ جو کسان زمین کو اپنے خون پسینے سے سیراب کرتا ہے، بیج بوتا ہے، فصل اگاتا ہے، مگر اس کے اپنے گھر میں روٹی میسر نہیں، اس سے بڑا معاشی تضاد کیا ہو سکتا ہے؟ اقبال کا یہ شعر اسی استحصالی بندوبست کو للکارتا ہے جس میں پیداوار کرنے والا بھوکا اور پیداوار پر قابض طبقہ خوشحال رہتا ہے۔

اقبال کے عہد میں انقلابِ روس 1917ء نے پوری دنیا کے سیاسی اور فکری منظرنامے کو متاثر کیا۔ یہ انقلاب مزدوروں، کسانوں اور محنت کشوں کی طبقاتی جدوجہد کے نتیجے میں سرمایہ دارانہ اور زار شاہی نظام کے خلاف ایک بڑی تاریخی تبدیلی کا مظہر تھا۔ اقبال نے بھی اس انقلاب اور اس کے نتیجے میں پیدا ہونے والے عالمی سیاسی و معاشی مباحث کو گہری نظر سے دیکھا۔ ان کی نظم ’’لینن خدا کے حضور میں‘‘ سرمایہ دارانہ نظام، مشینی تہذیب اور معاشی استحصال پر ان کے تنقیدی شعور کی نمایاں مثال ہے۔

وہ مغربی سرمایہ دارانہ تہذیب اور مشینی نظام کے انسان پر اثرات کا جائزہ لیتے ہوئے کہتے ہیں:

ہے دل کے لیے موت مشینوں کی حکومت
احساسِ مروّت کو کُچل دیتے ہیں آلات

آثار تو کچھ کچھ نظر آتے ہیں کہ آخر
تدبیر کو تقدیر کے شاطر نے کیا مات

اقبال کی تنقید مشین یا سائنسی ترقی کے خلاف نہیں بلکہ اس معاشی نظام کے خلاف ہے جس میں مشین انسان کی سہولت اور فلاح کا ذریعہ بننے کے بجائے سرمایہ دار کے منافع میں اضافے اور محنت کش کے استحصال کا آلہ بن جاتی ہے۔ جب پیداوار کے ذرائع چند ہاتھوں میں مرتکز ہو جائیں اور انسانی محنت کی قدر صرف منافع کے پیمانے سے متعین ہونے لگے تو ترقی کے تمام دعوے اپنی اخلاقی معنویت کھو دیتے ہیں۔

یہی وہ مقام ہے جہاں اقبال کا فکری پیغام سرمایہ دارانہ نظام کے بنیادی تضادات سے براہِ راست مکالمہ کرتا دکھائی دیتا ہے۔ ان کے نزدیک انسان کی عظمت دولت کے انبار میں نہیں بلکہ اس کی خودداری، محنت، کردار اور تخلیقی قوت میں ہے۔

سرمایہ دارانہ نظام کا سب سے بڑا المیہ یہی ہے کہ اس میں دولت پیدا کرنے والا محنت کش خود اپنی پیدا کردہ دولت سے محروم رہتا ہے۔ مزدور اپنی زندگی کا قیمتی وقت، جسمانی قوت اور ذہنی صلاحیتیں صرف کرتا ہے، مگر پیداوار اور اس کے منافع پر اختیار کسی دوسرے طبقے کا ہوتا ہے۔ یوں محنت کرنے والا انسان اپنی ہی تخلیق کردہ معاشی دنیا میں اجنبی بن جاتا ہے۔ سرمایہ اور منافع کی بالادستی انسان کی آزادی، سماجی تعلقات اور انسانی اقدار کو بھی اپنی گرفت میں لے لیتی ہے۔

اقبال اسی طبقاتی ناانصافی اور محنت کش کی تلخ زندگی کو خدا کے حضور پیش کرتے ہوئے سوال اٹھاتے ہیں:

تو قادر و عادل ہے مگر تیرے جہاں میں
ہیں تلخ بہت بندۂ مزدور کے اوقات

کب ڈُوبے گا سرمایہ پرستی کا سفینہ؟
دنیا ہے تری منتظرِ روزِ مکافات!

یہاں اقبال کا سوال صرف مذہبی یا اخلاقی نوعیت کا نہیں بلکہ ایک گہرا معاشی اور سماجی سوال بھی ہے۔ اگر دنیا میں انصاف کا تصور موجود ہے تو پھر وہ مزدور جو اپنی محنت سے کارخانوں کو چلاتا، عمارتیں تعمیر کرتا، سڑکیں بناتا، کھیتوں میں فصلیں اگاتا اور معاشرے کی بنیادی ضروریات پوری کرتا ہے، خود بنیادی انسانی سہولتوں سے محروم کیوں ہے؟ آخر اس کی محنت کا پورا صلہ اسے کیوں نہیں ملتا؟

اقبال کا یہ سوال آج بھی اتنا ہی اہم اور متعلقہ ہے جتنا ان کے اپنے عہد میں تھا۔ آج سرمایہ داری کی شکلیں بدل چکی ہیں۔ کثیرالقومی کمپنیاں، مالیاتی ادارے، اجارہ داریاں اور عالمی منڈی کی قوتیں دنیا کی معیشت پر اثرانداز ہیں۔ دولت اور وسائل کا ارتکاز ایک محدود طبقے تک بڑھتا جا رہا ہے، جبکہ دنیا کے مختلف خطوں میں مزدور، کسان اور عام محنت کش مہنگائی، بے روزگاری، کم اجرت، غیر محفوظ روزگار اور معاشی عدم تحفظ کا شکار ہیں۔

پاکستان میں بھی محنت کش طبقے کی صورت حال اس تضاد کی واضح مثال ہے۔ ایک طرف سرمایہ دارانہ اور جاگیردارانہ مفادات کو تحفظ حاصل ہے، دوسری طرف مزدور کو مناسب اجرت، روزگار کا تحفظ، علاج، تعلیم اور رہائش جیسی بنیادی سہولتوں کے لیے جدوجہد کرنا پڑتی ہے۔ کسان فصل اگاتا ہے مگر زرعی مداخل کی بڑھتی قیمتوں، قرضوں، پانی کی قلت اور منڈی کے استحصالی ڈھانچے میں پستا ہے۔ کارخانے کا مزدور ملکی پیداوار میں حصہ ڈالتا ہے مگر مہنگائی کے مقابلے میں اس کی اجرت اور معیارِ زندگی مسلسل دباؤ کا شکار رہتے ہیں۔

اقبال کی شاعری ہمیں یہ سوچنے پر مجبور کرتی ہے کہ کسی معاشرے کی ترقی کا پیمانہ اس کے امیر ترین افراد کی دولت نہیں بلکہ اس کے عام شہری، مزدور اور کسان کی زندگی کا معیار ہونا چاہیے۔ اگر پیداوار میں اضافہ ہو، دولت کے ذخائر بڑھیں اور قومی معیشت کے اعداد و شمار بہتر ہوں لیکن محنت کش کے گھر میں روٹی، بچوں کے لیے تعلیم، خاندان کے لیے علاج اور باعزت روزگار میسر نہ ہو تو ایسی ترقی کا سماجی انصاف سے کوئی تعلق نہیں۔

اقبال کو صرف چند مخصوص اشعار، تقریروں اور رسمی تقریبات تک محدود کر دینا ان کے وسیع فکری ورثے کے ساتھ ناانصافی ہے۔ ان کے پیغام کو حقیقی معنوں میں سمجھنے کے لیے ضروری ہے کہ ہم ان کی شاعری میں موجود طبقاتی شعور، انسانی آزادی، معاشی انصاف اور استحصالی نظام کے خلاف احتجاج کو بھی اپنی فکری اور عملی زندگی کا حصہ بنائیں۔

اقبال کا پیغام آج کے مزدور، کسان، طالب علم اور محروم انسان کے لیے بھی یہی ہے کہ وہ اپنی حیثیت کو پہچانے، اپنی محنت کی قدر کا مطالبہ کرے اور ایک ایسے معاشرے کی تشکیل کے لیے جدوجہد کرے جہاں دولت چند ہاتھوں میں جمع ہونے کے بجائے انسانی فلاح، اجتماعی ترقی اور معاشی انصاف کا ذریعہ بنے۔

یومِ اقبال پر اقبال کو خراجِ عقیدت پیش کرنے کا بہترین طریقہ صرف ان کے اشعار پڑھنا نہیں بلکہ ان کے اس پیغام کو سمجھنا اور آگے بڑھانا ہے جس میں غریب کی بیداری، مزدور کی خوشحالی، کسان کی خودداری اور انسان کی آزادی کا خواب موجود ہے۔

کیونکہ اقبال کا سوال آج بھی ہمارے سامنے کھڑا ہے:

کب ڈُوبے گا سرمایہ پرستی کا سفینہ؟