لاہور: سگنل پر کھڑی کار پر ٹرالر چڑھ دوڑا، حادثے میں 3 افراد جاں بحق

لاہور کے علاقے گڑھی شاہو میں علامہ اقبال روڈ پر ٹریفک حادثے میں ٹریفک سگنل پر کھڑی کار 22 ویلر ٹرالر تلے کچلی گئی جس کے نتیجے میں میاں بیوی اور ان کا بیٹا جاں بحق ہوگئے۔ریسکیو اہلکاروں نے طویل آپریشن کے بعد تینوں افراد کی لاشیں تباہ شدہ کار سے نکال لیں۔اطلاع ملنے پر پولیس اور ریسکیو 1122 کی ٹیمیں موقع پر پہنچ گئیں۔ کار کو ٹرالر کے نیچے سے نکالنے کے لیے کرین اور دوسرے ٹرالر کی مدد لی گئی۔ جبکہ گاڑی میں پھنسے افراد تک پہنچنے کے لیے ریسکیو اہلکاروں نے کار کے مختلف حصے کاٹے۔ امدادی کارروائی کے دوران تینوں افراد کی لاشیں نکال کر مردہ خانے منتقل کردی گئیں۔

پولیس کا کہنا ہے کہ حادثہ گڑھی شاہو میں علامہ اقبال روڈ پر پیش آیا جہاں ٹریفک سگنل پر کھڑی کار پر 22 ویلر ٹرالر چڑھ دوڑا۔ ٹرالر کے بھاری وزن کے باعث کار مکمل طور پر پچک گئی اور اس میں سوار افراد پھنس گئے۔جاں بحق افراد کی شناخت محمد عاصم، ان کی اہلیہ ہما عاصم اور بیٹے طلحہ عاصم کے نام سے ہوئی ہے۔ تینوں کا تعلق لاہور کے علاقے اچھرہ میں شاہ جمال سے بتایا گیا ہے۔