rehber Logo

ایران کے قائم مقام وزیرِ دفاع مجید ابن الرضا نے دعویٰ کیا ہے کہ ملک نے اپنے مخالفین کے لیے کئی اہم ’سرپرائزز‘ تیار کر رکھے ہیں تاہم ان کی تفصیلات فی الحال منظرِ عام پر لانا مناسب نہیں۔ مجید ابن الرضا کا کہنا تھا کہ ایران کی دفاعی صنعت میں مختلف منصوبوں پر مسلسل کام جاری ہے، جبکہ ملک کے پاس موجود سائنسی صلاحیت، تجربہ اور نوجوانوں کی استعداد مستقبل میں اہم نتائج سامنے لا سکتی ہے۔ ایران کے مخالفین کو یہ بات ذہن میں رکھنی چاہیے کہ ان ’سرپرائزز‘ کے بارے میں انہیں مناسب وقت پر خود ہی معلوم ہو جائے گا۔

ایران کے سپریم لیڈر کی جانب سے صدر کو ملک میں افراطِ زر کم کرنے اور معاشی مسائل پر توجہ دینے کی ہدایت کیے جانے کی اطلاعات بھی سامنے آئی ہیں۔ جنگ کے طویل ہوتے عرصے کے دوران ایران کو دفاعی کے ساتھ ساتھ معاشی دباؤ کا بھی سامنا ہے۔ جنگ کو چھ ماہ مکمل ہو چکے ہیں اور اس دوران ایران نے مشرقِ وسطیٰ میں امریکی فوجی اور انٹیلی جنس تنصیبات کو اربوں ڈالر کا نقصان پہنچانے کا دعویٰ کیا ہے۔اس صورتحال کے ساتھ امریکی دفاعی نظام میں استعمال ہونے والے میزائل انٹرسیپٹرز کے ذخائر بھی توجہ کا مرکز بن گئے ہیں۔انٹرسیپٹرز کی تعداد تیزی سے کم ہو رہی ہے، جبکہ نئے انٹرسیپٹرز کی تیاری نہ صرف مہنگی بلکہ وقت طلب بھی ہے۔

ایران کی جانب سے ’سرپرائزز‘ کے دعوے اور امریکی دفاعی ذخائر سے متعلق متضاد اطلاعات نے خطے میں جاری کشیدگی کے مستقبل کے حوالے سے مزید سوالات پیدا کر دیے ہیں۔

تاہم وائٹ ہاؤس اور پینٹاگون نے امریکی اسلحے اور گولہ بارود کے ذخائر میں کمی یا قلت سے متعلق رپورٹس کو مسترد کرتے ہوئے کہا ہے کہ امریکی دفاعی صلاحیت متاثر ہونے کی اطلاعات درست نہیں۔