چین : طوفانی بارش اور سیلاب سے نظام زندگی درہم برہم ،سینکڑوں پروازیں اور ٹرین سروسز منسوخ
چین میں طوفانی بارش اور سیلاب سے نظام زندگی درہم برہم ہوگیا۔ سیلاب سے درجنوں گاڑیاں بھی بہہ گئیں جن کی ویڈیو سوشل میڈیا پر بھی وائرل ہورہی ہے۔ حکام نے بتایا کہ ملک بھر میں 46 دریاؤں میں پانی کی سطح خطرے کے نشان سے اوپر ریکارڈ کی گئی ہے ، موسم کی خراب صورتحال کے باعث سیکڑوں پروازیں اور ٹرین سروسز منسوخ کر دی گئی ہیں جبکہ کئی علاقوں میں سکول بھی بند کر دیئے گئے ہیں۔
چین کے مشرقی علاقوں میں طاقتور طوفان ’’باوی ‘‘کی وجہ سے آندھی کے ساتھ تیز بارش سے سیلابی صورتحال پیدا ہوگئی۔حکام کی جانب سے مزید بارشوں کی پیشگوئی کی گئی ہے جبکہ صوبے ژی جیانگ میں 20 لاکھ کے قریب لوگوں کو محفوظ مقام پر منتقل کردیا گیا ہے۔اس کے علاوہ صوبے ہیبئی کے گاؤں کوانچینگ میں طوفان کے باعث تقریباً1800 کے قریب افراد پھنس گئے اور سڑکوں پر پانی کی سطح 2 میٹر سے زائد بلند ہوگئی تھی۔
