ورلڈ کپ فائنل کی آخری گیند اور ہاف ٹائم شو کے ملبوسات نیلام ہوں گے
معروف بین الاقوامی نیلام گھر کرسٹیز نے اعلان کیا ہے کہ فیفا ورلڈ کپ سے متعلق نایاب اور یادگار اشیا کی ایک خصوصی آن لائن نیلامی 22 جولائی سے شروع کی جائے گی، جس سے حاصل ہونے والی آمدنی دنیا بھر میں بچوں کی تعلیم کے فروغ کے لیے وقف کی جائے گی۔کرسٹیز کے مطابق ایک ہفتے پر مشتمل اس آن لائن نیلامی سے حاصل ہونے والی رقم فیفا گلوبل سٹیزن ایجوکیشن فنڈ کو دی جائے گی، جس کا مقصد ورلڈ کپ کے ذریعے دنیا بھر کے بچوں کی تعلیم کے لیے 100 ملین ڈالر جمع کرنا ہے۔
نیلامی کی نمایاں اشیا میں عالمی شہرت یافتہ کولمبین گلوکارہ شکیرا کا وہ پیلے رنگ کا کراپ ٹاپ اور ٹراؤزر شامل ہے، جو انہوں نے ورلڈ کپ 2026 کے سرکاری گانے “ڈائی ڈائی” کی میوزک ویڈیو میں پہنا تھا۔اس کے علاوہ ورلڈ کپ فائنل کے تاریخی ہاف ٹائم شو میں شکیرا کی جانب سے پہنا جانے والا لباس بھی نیلامی کے لیے پیش کیا جائے گا۔ یاد رہے کہ فیفا ورلڈ کپ کی تاریخ میں پہلی مرتبہ فائنل کے وقفے کے دوران 11 منٹ پر مشتمل خصوصی میوزیکل شو منعقد کیا جائے گا، جس میں میڈونا ، جسٹن بیبراور بی ٹی ایس کی پرفارمنس بھی متوقع ہے۔
نیلامی میں ورلڈ کپ کی کئی تاریخی فٹ بالز بھی شامل ہوں گی، جن میں 19 جولائی کو نیو جرسی کے میٹ لائف اسٹیڈیم میں کھیلے جانے والے ورلڈ کپ فائنل میں استعمال ہونے والی آفیشل گیند بھی شامل ہے۔ اس کے علاوہ گزشتہ ماہ میکسیکو میں کھیلے گئے افتتاحی میچ میں استعمال ہونے والی گیند بھی خریداروں کے لیے پیش کی جائے گی۔
فیفا ورلڈ کپ 2022 میں ارجنٹینا کی قومی ٹیم کی وہ جرسی بھی نیلامی کا حصہ ہوگی، جس پر عالمی شہرت یافتہ فٹبالر لیونل میسی کے دستخط موجود ہیں۔نیلامی میں امریکا کی مردوں کی قومی فٹبال ٹیم کی دستخط شدہ جرسی بھی شامل کی گئی ہے، جس پر ٹیم کے متعدد کھلاڑیوں کے آٹوگراف موجود ہیں۔منتظمین کے مطابق اس منفرد نیلامی کا مقصد نہ صرف کھیل کی تاریخی یادگاروں کو مداحوں تک پہنچانا ہے بلکہ ان کی فروخت سے حاصل ہونے والی رقم کے ذریعے دنیا بھر کے لاکھوں بچوں کے لیے تعلیمی مواقع پیدا کرنا بھی ہے۔
