دعا لیپا اور کالم ٹرنر رشتہ ازدواج میں بندھ گئے

عالمی شہرت یافتہ برطانوی گلوکارہ دعا لیپا اور اداکار کالم ٹرنر نے اپنے طویل عرصے سے جاری تعلق کو باضابطہ طور پر رشتہ ازدواج میں تبدیل کر لیا ہے۔دونوں کی شادی لندن میں ایک نہایت سادہ اور نجی تقریب کے دوران انجام پائی، جس نے مداحوں کو خوشی اور حیرت دونوں میں مبتلا کر دیا۔ یہ تقریب 31 مئی کو لندن کے معروف اولڈ میری لیبون ٹاؤن ہال میں منعقد ہوئی، جہاں صرف قریبی اہل خانہ اور چند دوستوں کو شرکت کی اجازت دی گئی۔ شادی کو مکمل طور پر نجی رکھا گیا جبکہ بعد ازاں محدود مہمانوں کے لیے ایک مختصر ڈنر کا بھی اہتمام کیا گیا۔

تقریب میں دعا لیپا سفید دلہن کے لباس میں جلوہ گر ہوئیں، جس کے ساتھ انہوں نے دستانے اور ایک اسٹائلش ہیٹ بھی پہن رکھا تھا۔ دوسری جانب کالم ٹرنر نیوی بلیو سوٹ اور ٹائی میں انتہائی پُروقار انداز میں نظر آئے۔ شادی کے بعد دونوں کو ہاتھوں میں ہاتھ ڈالے خوشگوار موڈ میں دیکھا گیا۔ اس جذباتی موقع پر کالم ٹرنر اپنی دلہن کو آتے دیکھ کر بے حد متاثر ہوئے اور ان پر جذباتی کیفیت طاری ہو گئی۔ عینی شاہدین کا کہنا ہے کہ وہ آنکھوں میں آنسو لیے اپنی جذباتی کیفیت پر قابو پانے کی کوشش کر رہے تھے، جبکہ تقریب میں موجود قریبی افراد بھی اس لمحے کو دیکھ کر جذباتی ہو گئے۔

دعا لیپا اور کالم ٹرنر کے تعلقات کا آغاز جنوری 2024 میں ہوا تھا جب دونوں کو لندن میں ایک تقریب کے دوران پہلی بار ایک ساتھ دیکھا گیا۔ بعد ازاں جولائی 2024 میں دونوں نے اپنے تعلق کو عوامی سطح پر تسلیم کیا، جس کے بعد مداحوں میں ان کے رشتے کو لے کر دلچسپی مزید بڑھ گئی۔بعد میں دونوں کی منگنی کی خبریں بھی سامنے آئیں اور اب شادی کی باضابطہ تصدیق نے مداحوں کو خوشی سے نہال کر دیا ہے۔ اطلاعات کے مطابق جوڑا اپنی شادی کی تقریبات کو دو حصوں میں منانے کا ارادہ رکھتا ہے، جس کا دوسرا بڑا جشن جلد اٹلی کے علاقے سسلی میں متوقع ہے۔سادگی اور نجی ماحول میں منعقد ہونے والی یہ تقریب دونوں کی خواہش کے عین مطابق قرار دی جا رہی ہے، جبکہ دنیا بھر سے مداح جوڑے کو مبارکباد پیش کر رہے ہیں۔