rehber Logo

چین نے امریکہ اور ایران کے درمیان پہلے مرحلے کی مفاہمتی یادداشت کے متن پر اتفاق رائے کا خیرمقدم کرتے ہوئے اس پیش رفت میں پاکستان کے ثالثی کردار کو سراہا ہے۔ چینی وزارت خارجہ کے ترجمان لین جیان نے ایک سوال کے جواب میں کہا کہ چین امریکہ  اور ایران کے درمیان طے پانے والے معاہدے کو مثبت پیش رفت سمجھتا ہے۔پاکستان کی جانب سے دونوں ممالک کے درمیان مذاکرات میں سہولت کاری کی کوششوں کو قدر کی نگاہ سے دیکھتتے ہوئے چینی ترجمان نے امید ظاہر کی ہے کہ دونوں ممالک طے شدہ شیڈول کے مطابق معاہدے پر دستخط کریں گے۔

ترجمان سے پاکستان کے وزیراعظم کی جانب سے کیے گئے اس اعلان پر تبصرہ کرنے کو کہا گیا تھا جس میں بتایا گیا تھا کہ امریکہ اور ایران مذاکرات کے ذریعے پہلے مرحلے کی مفاہمتی یادداشت کے متن پر متفق ہو گئے ہیں اور لبنان سمیت تمام خطوں میں فوجی کارروائیوں کے فوری اور مستقل خاتمے کا اعلان کیا گیا ہے۔لین جیان نے کہا کہ چین امید کرتا ہے کہ تمام متعلقہ فریق امن کے راستے پر کاربند رہیں گے اور اپنے اختلافات کو مذاکرات اور بات چیت کے ذریعے حل کریں گے۔انہوں نے مشرق وسطیٰ اور خلیجی خطے میں امن و استحکام کی اہمیت پر زور دیتے ہوئے کہا کہ چین علاقائی تنازعات کے حل کے لیے سفارتی اور سیاسی ذرائع کی حمایت جاری رکھے گا۔ چین عالمی برادری کے ساتھ مل کر مشرق وسطیٰ اور خلیجی خطے میں امن و استحکام کی جلد بحالی کے لیے تعمیری کردار ادا کرنے کو تیار ہے۔ چین ہمیشہ سے سیاسی مکالمے اور پرامن مذاکرات کو تنازعات کے حل اور کشیدگی میں کمی کا مؤثر ترین ذریعہ قرار دیتا آیا ہے۔ امریکا اور ایران کے درمیان حالیہ مفاہمت نہ صرف علاقائی کشیدگی میں کمی کا باعث بن سکتی ہے بلکہ وسیع تر استحکام اور امن کے لیے بھی سازگار ماحول پیدا کرے گی۔