rehber Logo

آپریشن سوئفٹ ریٹارٹ کو 7 سال مکمل ہو گئے، اس موقع پر افواجِ پاکستان نے اس تاریخی کارروائی کو خراجِ تحسین پیش کیا ہے۔پاک فوج کے شعبہ تعلقاتِ عامہ انٹر سروسز پبلک ریلیشنز (آئی ایس پی آر) کے مطابق فیلڈ مارشل سید عاصم منیر اور سربراہانِ بحریہ و فضائیہ نے مشترکہ پیغام میں اس عزم کا اعادہ کیا ہے کہ قومی سلامتی اور علاقائی امن کے تحفظ کے لیے پاکستان کا عزم غیر متزلزل ہے۔27 فروری 2019ء کو شروع کیے گئے آپریشن سوئفٹ ریٹارٹ کے ذریعے بھارتی جارحیت کا فیصلہ کن جواب دیا گیا۔اس کارروائی نے افواجِ پاکستان کی پیشہ ورانہ مہارت، تیاری اور دفاعی صلاحیتوں کو نمایاں کیا۔

 اس آپریشن نے مزید جارحیت کو روکا اور خطے میں تزویراتی توازن بحال کیا، قیادت نے اس موقع پر اس امر کا اعادہ کیا کہ افواجِ پاکستان ہر خطرے کا بھرپور مقابلہ کرنے کے لیے مکمل طور پر تیار ہیں۔پاکستان اپنی خود مختاری کے تحفظ اور عالمی استحکام میں کردار ادا کرتا رہے گا۔