rehber Logo

پاکستان آرمی کی فضائی قوت میں ایک اور اضافہ ہوا ہے۔ دشمن کے فضائی و زمینی اہداف کو مؤثر طریقے سے نشانہ بنانے کی صلاحیت رکھنے والے گن شپ ہیلی کاپٹر کی شمولیت بدلتے ہوئے جنگی ماحول میں نئی پیشرفت قرار دی جا رہی ہے۔چیف آف آرمی اسٹاف فیلڈ مارشل سید عاصم منیر نے ملتان گیریژن کا اہم دورہ کیا جہاں انہوں نے کور ہیڈکوارٹر میں فارمیشن کی آپریشنل تیاریوں اور جاری تربیتی سرگرمیوں پر تفصیلی بریفنگ حاصل کی۔ آرمی چیف نے پاک فوج کی اعلیٰ پیشہ ورانہ مہارت، تربیتی معیار اور جنگی تیاریوں پر اطمینان کا اظہار کرتے ہوئے ملکی خودمختاری اور علاقائی سالمیت کے دفاع کے عزم کا اعادہ کیا۔ آرمی چیف نے ملتان گیریژن میں پاک فوج کے لیے جدید Z-10ME اٹیک ہیلی کاپٹر کی شمولیت کی تقریب کی صدارت کی۔ یہ جدید ترین، ہر موسم میں دن و رات کام کرنے والا گن شپ پلیٹ فارم جدید ریڈار، الیکٹرانک وارفیئر سسٹمز اور ہدف شکن ہتھیاروں سے لیس ہے جو دشمن کے فضائی و زمینی اہداف کو مؤثر طریقے سے نشانہ بنانے کی صلاحیت رکھتا ہے۔ Z-10ME کی شمولیت کو پاک فوج کی جدید جنگی حکمت عملی اور ایوی ایشن اپ گریڈیشن میں ایک فیصلہ کن پیش رفت قرار دیا گیا ہے۔ فیلڈ مارشل عاصم منیر نے مظفرگڑھ فیلڈ فائرنگ رینج میں Z-10ME ہیلی کاپٹرز کی جانب سے کیے گئے فائر پاور مظاہرے کا مشاہدہ کیا۔ اس موقع پر پاک فوج کے مختلف یونٹس نے کمبائنڈ آرمز ٹیکٹکس کا شاندار مظاہرہ پیش کیا۔ آرمی چیف نے جوانوں کے بلند مورال، پیشہ ورانہ مہارت اور جنگی تیاریوں کو سراہا اور کہا کہ پاک فوج بدلتے ہوئے جنگی ماحول میں بھی فیصلہ کن برتری برقرار رکھنے کے لیے پوری طرح تیار ہے۔ آرمی چیف نے اپنے دورے کے دوران مختلف علمی و سماجی شخصیات سے بھی ملاقات کی۔ اس موقع پر انہوں نے قومی اتحاد، سول ملٹری ہم آہنگی اور مشترکہ قومی حکمت عملی کی اہمیت پر زور دیا۔ انہوں نے کہا کہ موجودہ دور کے ہائبرڈ خطرات سے نمٹنے کے لیے پوری قوم کا متحد ہونا ناگزیر ہے۔ آرمی چیف نے کور ہیڈکوارٹر ملتان میں خطاب کرتے ہوئے کہا کہ پاکستان کی قومی خودمختاری اور علاقائی سلامتی کا ہر قیمت پر دفاع کیا جائے گا۔ انہوں نے پاک فوج کی جانب سے جاری تربیتی سرگرمیوں کو قابلِ فخر قرار دیتے ہوئے کہا کہ یہ تیاری دشمن کو منہ توڑ جواب دینے کی صلاحیت کو مزید مضبوط بناتی ہے۔ فیلڈ مارشل عاصم منیر کی ملتان آمد پر کور کمانڈر ملتان نے ان کا استقبال کیا۔ دورے کو عسکری ماہرین نے پاک فوج کی آپریشنل تیاریوں کے جائزے اور جدید ٹیکنالوجی کے انضمام کے تناظر میں انتہائی اہم قرار دیا ہے۔