rehber Logo

میانمار کی سیکیورٹی فورسز نے ایک ریٹائرڈ فوجی افسر کے قتل کے الزام میں  چھ  سالہ بچی کو اس کی والدہ اور دیگر 15 مشتبہ افراد کے ہمراہ گرفتار کر لیا ہے۔یہ گرفتاریاں ملک کے چار مختلف علاقوں سے کی گئیں، اور ان میں 13 مرد اور تین خواتین شامل ہیں۔ گرفتار ہونے والوں میں چھ سالہ لن لاٹ شوے بھی شامل ہے، جو مبینہ قاتل میو کو کو کی بیٹی ہے۔ میو کو کو کے کئی دوسرے نام بھی رپورٹ ہوئے ہیں۔ بچی اور اس کے والدین کو مرکزی شہر بگان سے گرفتار کیا گیا۔

یہ گرفتاریاں 68 سالہ ریٹائرڈ بریگیڈیئر جنرل چو ٹن آونگ کے قتل کے بعد کی گئی ہیں، جنہیں 22 مئی کو ینگون میں ان کے گھر کے باہر گولی مار کر ہلاک کیا گیا تھا۔ ایک غیر معروف مسلح گروپ گولڈن ویلی واریئرز نے اس قتل کی ذمہ داری قبول کی تھی۔ گرفتار افراد میں ایک نجی ہسپتال کا مالک بھی شامل ہے، جس پر الزام ہے کہ اس نے حملے کے دوران زخمی ہونے والے قاتل کا علاج کیا۔ تاہم گولڈن ویلی واریئرز نے ان 16 افراد سے کسی بھی قسم کے تعلق سے انکار کیا ہے۔