رحیم یارخان اور نواحی علاقوں سے دن دیہاڑے خواتین کے اغواء کی وارداتیں جاری‘ مزید تین خواتین اغواء
رحیم یارخان اور نواحی علاقوں سے دن دیہاڑے خواتین کے اغواء کی وارداتیں جاری‘ مزید تین خواتین کو اغواء کرلیاگیا‘ ورثاء کی عدم موجودگی میں دوشیزہ سے اوباش ملزم کی زیادتی کی کوشش‘ پولیس نے ورثاء کی شکایات پر مغوی خواتین وملزمان کی تلاش شروع کردی۔ اغواء کی پہلی واردات چک 33اے کے رہائشی ایاز احمد کے گھر پر ہوئی جوروزگار کے سلسلہ میں گھر پر موجود نہ تھا کہ عدم موجودگی کا فائدہ اٹھاتے ہوئے اس کی بیوی اقراء بی بی کو ملزم شاہد اغواء کرکے فرار ہوگیا۔
دوسری واردات امین آباد کے رہائشی محمدعمران کے گھر پر ہوئی جہاں ملزم سرفراز اپنے ساتھیوں عمیر‘ ممتاز کی مدد سے اس کی 28سالہ ہمشیرہ سائرہ مٹھن مائی کو اغواء کرکے فرار ہوگیا۔
تیسری واردات بھٹہ کالونی کی رہائشی سلطانہ بی بی کے گھر پر ہوئی جس کی 22سالہ بیٹی سمیرا فاروق کو حسین آباد کا رہائشی ملزم شاہ زیب اپنے نامعلوم ساتھیوں کی مدد سے اغواء کرکے فرار ہوگیا
چوتھی واردات کوٹلہ نواب کی رہائشی 13 سالہ مہوش کے ساتھ پیش آئی جس کے ورثاء عزیز کی شادی میں شرکت کے باعث گھر پر موجود نہ تھے۔ ان کی عدم موجودگی میں 13 سالہ مہوش فصل کماد میں رفع حاجت کیلئے گئی کہ اسی دوران ملزم ارباب نے زیادتی کی کوشش کی تاہم شور واویلا پر ملزم موقع سے فرار ہوگیا۔ پولیس نے ورثاء کی شکایات پر مغوی خواتین وملزمان کی تلاش شروع کردی۔
