انگلینڈ اور بھارت کے درمیان آخری ٹیسٹ دلچسپ مرحلے میں داخل
انگلینڈ اور بھارت کے درمیان پانچواں اور آخری ٹیسٹ میچ دلچسپ مرحلے میں داخل ہو گیا، کھیل کے چوتھے روز بارش اور کم روشنی کے باعث میچ کو جلدی ختم کر دیا گیا۔انگلینڈ اور بھارت کے درمیان ٹیسٹ سیریز کا آخری مقابلہ اوول کے میدان میں جاری ہے جہاں دونوں ٹیمیں جیت کے لیے ایڑی چوٹی کا زور لگا رہی ہیں، انگلینڈ نے ہدف کے تعاقب میں 6 وکٹوں کے نقصان پر 339 رنز بنا لیے ہیں جبکہ اسے جیت کے لیے مزید 35 رنز درکار ہیں تو بھارت کو سیریز برابر کے لیے مزید 4 کھلاڑیوں کو آؤٹ کرنا ہو گا۔
آخری ٹیسٹ کے چوتھے روز جب غیر معمولی مقابلہ جاری تھا اس دوران کم روشنی اور موسلادھار بارش نے کھیل کو روک دیا، اس وقت انگلینڈ فتح سے صرف 35 رنز کی دوری پر تھا۔انگلینڈ کے ہیری بروک اور جو روٹ نے چوتھی وکٹ پر شاندار 195 رنز کی شراکت قائم کی جس نے انگلینڈ کو ریکارڈ ہدف کے قریب پہنچا دیا تھا، یہ کامیابی انہیں سیریز میں 1-3 سے کامیابی دلا سکتی ہے۔اس دوران جب بھارتی ٹیم دباؤ میں تھی اور انگلینڈ کو جیت کے لیے صرف 73 رنز درکار تھے، انگلش بیٹر ہیری بروک ایک غیر ذمہ دارانہ شاٹ کھیل کر آؤٹ ہو گئے، انہوں نے 111 رنز کی اننگز کھیلی۔یہ موقع بھارت کے لیے امید کی کرن بنا اور انہوں نے اس سے بھرپور فائدہ اٹھایا، جیکب بیتھل بھی جلد بازی میں شاٹ کھیل کر صرف 5 رنز پر آؤٹ ہو گئے، اپنی کیریئر کی بہترین فارم میں موجود جو روٹ جنہوں نے اپنی 39 ویں ٹیسٹ سنچری مکمل کی، پرساد کرشنا کی گیند پر وکٹ کیپر دھروو جوریل کو کیچ دے بیٹھے، جو روٹ 105 رنز بنا کر آؤٹ ہوئے۔
تناؤ میں ڈوبے ماحول میں جیمی سمتھ اور جیمی اوورٹن گیند کو بیٹ سے لگانے میں مشکلات کا شکار رہے اور کئی زبردست اپیلوں کے باوجود کسی طرح وکٹ بچانے میں کامیاب رہے، جب تک کہ امپائروں نے روشنی ناکافی قرار دے کر کھیل روک دیا تھا اس دوران موسلادھار بارش کے باعث مزید کھیل کا انعقاد ممکن نہ رہا۔کھیل کے پانچویں روز انگلینڈ 6 وکٹوں کے نقصان پر 339 رنز سے دوبارہ اننگز شروع کرے گا، زخمی کندھے کے باعث کرس ووکس کا کھیلنا ممکن نہیں اور بھارت کو اب بھی جیت کی امید ہے جو انہیں سیریز 2-2 سے برابر کرنے کا موقع فراہم کرے گی۔