عازمین حج سے واجبات کی وصولی کا آج سے آغاز
عازمین حج سے آج سے حج واجبات کی وصولی کا آغاز ہوگا۔وزارت مذہبی امور کے مطابق نامزد بینکوں اور آن لائن پورٹل کے ذریعے حج درخواستیں جمع کرانے کی سہولت فراہم کی گئی ہے، پہلے آئیے پہلے پائیےکی بنیاد پر رجسٹرڈ افراد سے پہلی قسط 4 تا 9 اگست وصول کی جائے گی، نشستیں دستیاب ہونے پر 11 تا 16 اگست نئے عازمین حج بھی اپلائی کرسکیں گے۔نشستیں مکمل ہوتے ہی حج واجبات کی وصولی روک دی جائے گی، حج پیکیج 2026 ساڑھے 11 تا ساڑھے 12 لاکھ کے درمیان ہوگا اور دوسری قسط یکم نومبر سے وصول کی جائے گی۔دوبارہ حج کرنے اور عمر کی بالائی حد کی پابندی ختم کی گئی ہے، یکم مارچ 2014 کے بعد پیدا ہونے والے بچے اپلائی نہیں کر سکتے۔ 38 سے 42 روزہ حج کیلئے 5 لاکھ روپے جمع کرانا ہوں گے جبکہ 20 سے 25 روزہ مختصر حج کی پہلی قسط کے طور پر ساڑھے 5 لاکھ روپے جمع کرانا ہوں گے۔ حج درخواستیں ملک کے 14 نامزد بینکوں میں جمع کرائی جا سکتی ہیں۔
