وزیر خزانہ پاک امریکا تجارتی مذاکرات کی تکمیل کیلئے واشنگٹن روانہ
وفاقی وزیر خزانہ سینیٹر محمد اورنگزیب پاک امریکا تجارتی مذاکرات کی تکمیل کے لیے واشنگٹن روانہ ہو گئے، ان کے دورہ کے دوران پاک امریکا ٹریڈ ڈائیلاگ پر حتمی بات چیت ہو گی۔ وزارت خزانہ کی جانب سے جاری اعلامیہ کے مطابق دونوں ملکوں کے مابین تجارتی معاہدہ کی تشکیل سے دونوں ممالک کی معیشتوں کو فائدہ ہو گا، مضبوط تجارتی اور معاشی تعلقات پاک امریکا دوطرفہ تعلقات کا اہم ستون ہیں،امریکا پاکستان کا سب سے بڑا تجارتی شراکت دار ہے۔ پاکستان دو طرفہ تجارتی تعلقات کو روایتی اور غیر روایتی شعبوں تک وسعت دینے کا خواہش مند ہے، دونوں ممالک کے مابین انفارمیشن ٹیکنالوجی، معدنیات اور زراعت جیسے اہم شعبوں میں شراکت داری کے وسیع مواقع موجود ہیں۔
خیال رہے کہ وزیر خزانہ کا دورہ امریکا دونوں ملکوں کے مابین دوطرفہ تجارتی و معاشی تعلقات کو مضبوط بنانے کی کڑی ہے۔