دریائے سندھ میں بھکر کے مقام پر سیلابی ریلا باحفاظت گزر گیا

دریائے سندھ میں بھکر کے مقام سے گزرنے والا بڑا سیلابی ریلا باحفاظت دیگر اضلاع کی طرف روانہ ہو گیا ہے۔محکمہ انہار کے مطابق فلڈ سیزن کے دوران 4 لاکھ 47 ہزار کیوسک کا بڑا سیلابی ریلا بغیر کسی نقصان کے بھکر سے گزر گیا۔ایس ای انہار بھکر نے بتایا کہ اس وقت دریائے سندھ میں پانی کا بہاؤ مسلسل کم ہو رہا ہے اور سیلاب کی شدت درمیانے درجے سے نچلے درجے میں داخل ہو چکی ہے۔چشمہ بیراج میں پانی کی آمد 2 لاکھ 83 ہزار 715 کیوسک جبکہ اخراج 2 لاکھ 61 ہزار 515 کیوسک ریکارڈ کیا گیا ہے۔ سیلابی خطرے کے پیش نظر فلڈ بند اور دیگر حساس مقامات کی مسلسل نگرانی جاری ہے۔دریا میں بالائی علاقوں میں ہونے والی بارشوں کے سبب آئندہ دنوں میں پانی کی سطح میں دوبارہ اضافہ ہو سکتا ہے جس کے پیش نظر تمام متعلقہ ادارے ہائی الرٹ پر ہیں۔دریائے سندھ کی صورتحال نارمل ہونے تک فلڈ مانیٹرنگ جاری رکھی جائے گی۔