محسن نقوی بحرین پہنچ گئے، گارڈ آف آنرز پیش، سکیورٹی تعاون بڑھانے پر زور

وفاقی وزیرداخلہ محسن نقوی ایک روزہ دورے پر بحرین کے دارالحکومت منامہ پہنچ گئے جہاں انہوں نے بحرینی ہم منصب سے ملاقات کی، ملاقات میں سکیورٹی تعاون بڑھانے پر زور دیا گیا۔بحرین انٹرنیشنل ایئرپورٹ پر بحرین کے وزیر داخلہ جنرل شیخ راشد بن عبداللہ الخلفیہ نے محسن نقوی کا شاندار استقبال کیا، بحرینی وزارت داخلہ ہیڈ کوارٹر منامہ فورٹ آمد پر وزیرداخلہ محسن نقوی کو گارڈ آف آنرز پیش کیا گیا۔وزیرداخلہ محسن نقوی کی اپنے بحرینی ہم منصب سے اہم ملاقات میں باہمی دلچسپی کے امور اور سکیورٹی تعاون پر تبادلہ خیال کیا گیا اور سکیورٹی تعاون مزید بڑھانے کی ضرورت پر زور دیا گیا۔ملاقات میں انسداد دہشتگردی، انسداد انسانی سمگلنگ اور انسداد منشیات کے حوالے سے دوطرفہ اشتراک کار پر بات چیت کی گئی، علاقائی و عالمی چیلنجز سے نمٹنے اور بحرین۔پاکستان مشترکہ سکیورٹی کمیٹی کے کام کو مزید موثر بنانے پر تبادلہ خیال کیا گیا۔بحرین کے وزیر داخلہ نے پاکستان اور بحرین کے درمیان سکیورٹی سمیت دیگر شعبوں میں تعاون اور ہم آہنگی کو سراہا اور کہا کہ محسن نقوی کا دورہ بحرین اور پاکستان کے درمیان مضبوط تعلقات پر مبنی سکیورٹی روابط کو مستحکم کرنے کا موقع ہے۔