رحیم یارخان: ایک ماہ قبل اغواء ہونیوالے تین مغویوں کو پولیس نے کچہ کے علاقہ سے بازیاب کرلیا
ایک ماہ قبل اغواء ہونیوالے بھتیجے سمیت تین مغویوں کو پولیس نے کچہ کے علاقہ میں کامیابی کارروائی کے بعد بازیاب کرلیا‘ اغواء کاروں نے بچے سمیت تین مغویوں کی رہائی کے عوض ورثاء سے 40 لاکھ سے زائد کا تاوان طلب کیاتھا جبکہ پولیس نے مغویوں کے اغواء کا مقدمہ نامعلوم اغواء کاروں کے خلاف درج کیا تھا‘ ذرائع کے مطابق تینوں مغویوں کی بازیابی مقامی زمینداروں کے تعاون سے ممکن ہوئی ہے۔ 27مئی کی شب موضع راجڑی بستی کٹہ کے رہائشی دوحقیقی بھائیوں امان اللہ‘ زمان اللہ اور پانچ سالہ بھتیجے رضوان کو رات کے اندھیرے میں اس وقت اغواء کرلیاگیا جب تینوں رقبہ پر ٹربائن کی حفاظت کیلئے سوئے ہوئے تھے۔ تینوں کے اغواء کا مقدمہ پولیس تھانہ احمدپورلمہ نے نامعلوم اغواء کاروں کے خلاف اندراج کیاتھا۔ اسی دوران اغواء کاروں کی جانب سے ویڈیو کے ذریعے مغویوں کی رہائی کے عوض 40لاکھ روپے کا تاوان طلب کیا تھا۔
گذشتہ روز ڈسٹرکٹ پولیس آفیسرکی قیادت میں کچہ میں مزدوروں کی بازیابی کیلئے کئے جانیوالے آپریشن کے دوران مقامی زمینداروں کے تعاون سے امان اللہ‘ زمان اللہ اور پانچ سالہ رضوان کی رہائی ممکن ہوگئی۔ پولیس کارروائی کے بعد بازیاب ہونیوالے مغویوں کو ورثاء کے حوالے کیاجائیگا جبکہ کچہ میں پولیس تھانہ بھونگ کے علاوہ سی آئی اے اور ایلیٹ فورس کی نفری نے کارروائی میں حصہ لیا۔
