rehber Logo

امریکی صدر ڈونلڈ ٹرمپ نے چین کی ٹیکنالوجی کمپنی بائٹ ڈانس کو ٹک ٹاک کی امریکی شاخ کسی غیر چینی خریدار کو فروخت کرنے کے لیے دی گئی ڈیڈ لائن میں 75 دن کی توسیع کر دی ہے۔ بصورت دیگر، ایپ پر مؤثر پابندی عائد کر دی جائے گی، جو 2024 کے قانون کے تحت جنوری سے نافذ ہونا تھی۔ٹرمپ نے اپنے سوشل میڈیا پلیٹ فارم ”ٹروتھ سوشل“ پر ایک پوسٹ میں کہا کہ ٹک ٹاک کے ممکنہ معاہدے کے لیے تمام ضروری منظوریوں میں وقت درکار ہے، اس لیے وہ ایک ایگزیکٹو آرڈر پر دستخط کر رہے ہیں تاکہ ایپ کو مزید 75 دن کے لیے فعال رکھا جا سکے۔

ٹرمپ کے حالیہ فیصلے سے قبل انہوں نے چین سے درآمدات پر محصولات میں 34 فیصد اضافہ کیا، جس کے بعد اب امریکہ میں چینی برآمدات پر کل 54 فیصد ٹیکس عائد ہوگا۔ اس تجارتی کشمکش کے دوران ٹرمپ نے عندیہ دیا ہے کہ اگر بیجنگ بائٹ ڈانس کو ٹک ٹاک فروخت کرنے میں مدد فراہم کرے تو امریکہ چین پر عائد محصولات میں نرمی کر سکتا ہے۔ٹرمپ نے کہا، ’ہم امید کرتے ہیں کہ چین کے ساتھ نیک نیتی سے کام جاری رکھیں گے، اگرچہ مجھے معلوم ہے کہ وہ ہماری باہمی محصولات کی پالیسی سے خوش نہیں ہیں، جو کہ منصفانہ اور متوازن تجارت کے لیے ضروری ہے۔‘